CBI Booked sections in Ys Jagan

హైదరాబాద్: వైయస్సార్ కాంగ్రెసు పార్టీ అధ్యక్షుడు, కడప పార్లమెంటు సభ్యుడు వైయస్ జగన్మోహన్ రెడ్డిపై సిబిఐ భారతీయ శిక్షా స్మృతి సెక్షన్ 120-బి రెడ్ విత్, 420, 409, 420, 468, 471, అవినీతి నిరోధక చట్టం సెక్షన్ 13(2), రెడ్ విత్ 13(1)(సి)(డి) కింద కేసు నమోదు చేసింది. ఆయా సెక్షన్ల క్రింద నేరం రుజువైతే నేరస్తుడికి ఈ క్రింది విధంగా శిక్ష పడే అవకాశం ఉంది.

సెక్షన్ 420 - దగా, మోసం క్రింద నేరం రుజువైతే ఏడేళ్ల వరకు జైలు శిక్ష, జరిమానా విధించవచ్చు.

సెక్షన్ 409 - కుట్రపూరితమైన నమ్మక ద్రోహం క్రింద నేరం రుజువైతే యావజ్జీవం లేదంటే పదేళ్ల జైలు శిక్ష, జరిమానా విధించవచ్చు.

సెక్షన్ 477 - ఖాతాలను తారుమారు చేయడం క్రింద నేరం రుజువైతే ఏడేళ్ల జైలు శిక్ష జరిమానా విధించవచ్చు.

సెక్షన్ 468 - ఫోర్జరీ పత్రాలను ఒరిజినల్ పత్రాలుగా చూపి మోసగించడం క్రింద నేరం రుజువైతే ఏడేళ్ల వరకు జైలు శిక్ష విధించే అవకాశముంది.

సెక్షన్ 471 - ఎవరినైనా మోసం చేయడానికి ఫోర్జరీ పత్రాలను, రికార్డులను ఉపయోగించడం క్రింద నేరం రుజువైతే ఏడేళ్ల జైలు శిక్ష విధించే అవకాశముంది.

సెక్షన్ 120బి - కుట్ర క్రింద నేరం రుజువైతే ఆరు నెలల జైలు శిక్ష, జరిమానా విధించే అవకాశముంది.

అవినీతి నిరోధక చట్టం సెక్షన్లు

సెక్షన్ 13(2) - ప్రభుత్వ హోదాలో అధికార దుర్వినియోగానికి పాల్పడినట్లు తేలితే కనీసం ఏడాది నుండి ఏడేళ్ల వరకు జైలు శిక్ష విధించవచ్చు. జరిమానా కూడా విధించవచ్చు.

సెక్షన్ 13(1)(డి) - అవినీతికి పాల్పడటం వల్ల స్వయంగా కానీ, మరో వ్యక్తి ద్వారా కానీ భారీగా లబ్ధి పొందడం, బహుమతులు స్వీకరించినట్లు తేలితే కనీసం ఏడాది నుండి ఏడేళ్ల వరకు జైలు శిక్ష జరిమానా విధించవచ్చు.